چیچک لرین قیزیل قانی - اسماعیل جمیلی

نغمه ای برای ندا- خون طلائی گلها

چیچک لرین قیزیل قانی

چیچک لرین قیزیل قانی یوماقدادیر قارانلیغین قباحتین

هارایلارین حقلی سسی کسمه ده دیر شوم نفسین ولایتین

قودوز قودورقان جانی لر قانین توکور چلنگ چلنگ لاله لرین

گؤزو باغلی قوللوقچوولار آرتیرمادا استبدادین رذالتین

دینی اینانج اولسایدی دا زاهید لرین چال چاپینین اویونجاغی

چیرکین اوزو چیخدی اؤزه ایرتیجانین فاسد فوسیل حیکومتین

اسمه ده دیر ایلیق یئللر حسرت اولان آزادلیغین عطری گلیر

آچمادادادیر سئوگیلی یار نقابینی آی اوزوندن حورییتین

دالغالانان یاشیل لیغین قورخوسوندان دیشی دوشموش قاریمیش قیش

سون گوجیله یاساقلاییر عبث یئره قیزیل گولون طراوتین

آنلی آچیق باشی اوجا الی یالین کور قورشونلار قارشیسیندا

قورتولوشون وورغونلاری گؤسترمه ده شوجاعتین نهایتین

حق اؤزو امداد ائله سین حقلی اولان حق سؤیله ین عاشیقلره

قارانلیغین باتیشیندا گؤرسون ائللر ایشیق اوزون سعادتین

اسماعیل جمیلی 1-4-88

قادین - اسماعیل جمیلی

قادین

قانادی سئوگینین

قولو سئودانین

گولون گولوشو ، گونشین اؤپوشو

آنا جلالیله تانرینین گؤروشو

جانیندا جانلار بسله ین

مغرور بویلو دوروشویلا

منله حیات ایره لییر سسله ین

*

 

قادین

یاشامین کئشیگینده

 

لای لا لای لا

درده دؤزه ن گوله گوله

یاوروسونون بلاسینی باغرا باسان بیله بیله

*

 

قادین

گوموش ساچلی

عومرون آغیر یوللاریندا یلماز آنام

گووه نیم ، یخیلماز قالام

مارال گؤزلو ، شیرین سؤزلو

ایپک ساچلی گؤزه ل آنام

*

 

قادین

منده ن منی منسیز آلان

گوی قورشاقی دویغوسیله

حیاتیما نور جالایان

آنام

 

قیزیم

 

قیز قارداشیم

سئوگیلیم

 

سئودالیم

 

سیرداشیم

*

 

قادین

 

گؤزه للیک تانریسی

منی بوتونله ده ن یاریم

 

حیات یولداشیم

آی گؤزل - اسماعیل جمیلی

آی گؤزل

یاز گلمه میش غنچه لنیب دوداقلار

گوله دؤنوب یاناقلارین آی گؤزل

دالغا دالغا بولوت تئیلن وور یانا

قارانلیقدان چیخسین اوزه آی گؤزل

سورمه له نیب آلا گؤزون اؤزوندن

بال سوزولور گول قوخولو سؤزوندن

گؤزله گؤزون گؤز وورانلار گؤزوندن

گؤزه للیگین تانریداند یر پای گؤزل

عومور قیسسا گون سایئلی آرزی بول

درده غمه فلک باخمیر چکیر قول

یاخینلاشیر آیریلیقیا گئدن یول

گئده نلره یوخدور گلن تای گؤزل

سئو سئویلسن توکنمزدیر بو دولت

قووسان اگر قاپی دؤیمز سعادت

اوزون گولمز پارلاتماسا محبّت

سئویلمه سن بو دنیایا وای گؤزل

گؤنده رن : علی آینالی

باهار تبریکلری - اسماعیل جمیلی

باهار  تبریکلری 

باهار نغمه سینی    دویان  چیچکلر        

طراوتلی    یئنی گونلر   گؤزله ییر

سئوه ن کؤنول حسرتیله دوستلارین       

سئوگی دولو گؤروشلرین اؤزله ییر

                                               

باهار گلیر ائلدن اوبادان  اوزاق            

سئوینج ایله کدر  یاشیر  بیر آندا

آرزوسیله  یاشاییروق او گونون          

بایرام  توتاق  دوغما  آذربایجاندا

                                         

گؤزلورم یوبانمیش اول باهاری کی    

کؤنول باغچاسیندا آرزی  گول  آچسین

اریسین  قورخونون قارا بوزلاری      

قفسلر  قریلسین  بولبول    دیل  آچسین

                                     

عین  باهاردیر  دم وصل جمال  دوستان      

رؤیت  حوسن  یاریله  تازه لنیرجسم ایله جان

گل نفسینله  رخوت  غربتی پایمال ائدک     

سئوگی  محبت  اولماسا یوخدو فراقه سون قویان

گؤنده رن : علی آینالی    

باهاریدیر یئنه - اسماعیل جمیلی

باهارایدیر یئنه 

آچ اوره یین  پنجره سین گوللو باهارایدیر   یئنه

گؤزده اومود اوزده گولوش سئوگیلی یارایدیر یئنه

غونچه آچیبدیر اؤرتوگون بولبوله ازدیریر اؤزون

گؤزلری  تازه نرگیزین مست وخومارایدیر یئنه

تازه   گلینلییین  گئین چترینی یاسمن آچیب

آینا  کیمی بولاغلارا کؤلگه سالارایدیر یئنه

لاله  دولاندیریر جامین عشقینه تازه دورانین

دوم دورو  بوز شلاله لر  داغدان آخارایدیر یئنه

قالدی قیشا  اوز  قارالیق چیخدی چمنده تخته  گول

سیرینه  چیخ یام یاماجین نقش ونگارایدیر  یئنه

غم قفسینده  کؤنلونو  قییما  کدر  اوساندیرا

آرزی اومود قاپلارینی سئوگی آچارایدیر یئنه

دردی درین دوغما ائلی نازلی یازی گؤزله مه ده

سئوگیسی سئودامیز اولان شانلی دیارایدیر یئنه

    

گؤنده رن : علی آینالی                                                    

بایرام اسماعیل جمیلی

بایرام – اسماعیل جمیلی

بایرام سنین گؤروشوندور

ایل دؤنومو     باهانه دیر

باهار سنین گولوشوندور

سؤز صحبتین ترانه دیر

 

یاناقلارین    قیزیل  گولدور

باخیشلارین سئوگی سئلی

سئودان  منی   ائدیب دلی

سویله مه  بو  ادا  نه  دیر

 

گول گؤزه لیم گوللر آچسین

یاسمن لر  عطیر   ساچسین

غم داغیلسین غصه قاچسین

زمان   یامان     زمانه  دیر

 

گونش  سریب     تئلین داغا

گول سوفره سین آچیب باغا

بیرجه   اؤپوش   بایراملیغا

وئرسن  اگر   شاها نه  دیر

گؤنده رن : علی آینالی

بو شعرین فارسی جه ترجمه سی بو وبلاکدا

 

تبریز - اسماعیل جمیلی

                 تبریز

تربت تبريز دير تند اسمه اي باد صبا

بو پريشانا دگيل آرتيق پريشانليق روا

گيزله نن بير گنج وار بو کسوت ويرانه ده

اسم اعظم بيلمه سن اولماز نه وار دير برملا

ظاهري گؤزله عيان اولماز عياري بو زرين

حسن يوسف دير زليخاسي گرک وئرسين بها

صائبي سيراب ائده ن حکمت سبوسي بوردادير

شمسينه مولاي عرفان ائيله يبدير اقتدا

قطره قطره جمع اولوب شهد ادب قطران تک

کوثر عشقي قيليب درد مسيحايه شفا

فضل محمودي آليب تيمور تيغينده ن کسر

دفع ائديب اسکندري بو يئرده اقبال وذکا

شوقيله اؤز اودلو عشقين سينه ده توتموش سهند

برق شمشير ارنلرده ن شفق آلميش جلا

گر نباتي لعلينين حيراني اولسان راجي اول

دولت وصلين شکوهي عومره بخش ائيلر بقا

بوردا صرّاف سخن اولموش هنر له شهريار

بوردا اقبال هنر معجز سياق ائتميش نوا

ساهر اولماز اولمايان بو مکتبين فرزانه سي

جان فدا ائتمکده ن ائتمز آشناسي امتنا

ارک قانين آينالي سرخاب ائديب رخسارينه

خلقينه ستار سردار ائيله ييب دئينين ادا

قلب آذربايجان تبريزده چرپيب مدام

شهره يه آفاق اولوب اؤز غيرتيله بو سرا

خواجه يه شيرازي مفتون ائيله ين ترک جميل

خال و خط ايلن ائديب صنعانين ايمانين فنا

آچ يوکون تبريز دير تبريز شهر دلبران

مقصد غائي بو يئر دير ساربانا مرحبا

 

اسماعیل جمیلی 

باهار گلیر

 

 

 

 

 

 

 

باهار گلیر

 

کپنکلر  گولدن گوله   قونورلار

باهار گلیر  پنجره نی   باغلاما

بنؤشه لر  کردیمیزه   دولورلار

بولاغ آخیر سن گؤزه لیم آغلاما

 

یئنه قالدی اوز قارالیق کؤموره

ظالیم شاختا ساراییندا گول بیتیر

ایلیق یئللر اسیر سزاق یئرینده

یاز چمنده آچیب چیچکدن چتیر

 

گول!  دردیمیز  بوزا دؤنوب      اریسین

خزان وورموش آرزی باغی گول آچسین

یاز  گتیرسین     یئنیلیگین     نغمه سین

کؤنوللرده    اومود دالی     زوغ آتسین

 

گول! اوچوشسون دوداق دوداق دردیمیز

سئوگی سئلی سارسین عؤمور یوللارین

کؤلگه لرده     سارالماسین     گولوموز

اسیر تورپاق   دادین آلسین     باهارین                  

اسماعیل جمیلی

                       

 

 

آنا - اسماعیل جمیلی

                  

وارلیغین ییخیلماز قالاسیسان

سئوگینین سیلینمز بویاسیسان

اوره گین اوخشایان نواسیسان

کؤنول دونیاسینین صفاسیسان

بئشیکده چالدیغین لایلالاردیر

ماهنیلارین ان گؤزه لی

دیلینده اوچوددوغون هاوالاردیر

یاشامین شیرین غزلی.  

ایاق باسدیغین جنّت

بؤلونوب تالانیرسادا

سوسله دیگین دویغو باغی

یاساقلانیب وراق وراق یانیرسادا

قوتسال آدینلا باغداشدیر

آدیم  سانیم   سونمز اوجاغیم

شیرین دیلینله یانیر گونش چراغیم

عطیرلی تورپاغینلا یاشانیر

دیلگیم  گووه نیم دایاغیم

آنا سئوگینله اسیر

اسیر وطنده  شانلی بایراغیم

 

نام شاعر :  اسماعیل جمیلی

آنا

 

                                   آنا

 

                                

آنا قوتساللیق اوجاغی

سئوگی قوجاغی

یارانیشین یاریسی

قالان یارینین تانریسی

آنا

سئوداسی دونیانی ساران

اوجالیغی زیروه لردن باج آلان

دؤزومو دنیزلردن درین

ایستی نفسی بولاغدان سرین

آنا

آدی آدلارین یاراشیغی

اؤزله اؤزلوگون  باریشیغی

آنا

آلیشا آلیشا یانا یانا

اینجیکلیگین دانا دانا

سئودیگینین سارماشیغی

بالاسینین عاشیقی

آنا

یاز عطیرلی اتگینده

یارینلارین موشتولوغو

چیچک آچان بئشیگینده

گله جگین تومورجوغو

آنا

آنالیغی دیلیمیزین یوکسه لیشی

دایانیشی یوردوموزون ایره لیشی

آنا

دویولماز سؤزو  بال

آنا

دانیلماز  سئویلن  قوتسال

 

نام شاعر : اسماعیل جمیلی   

باهار گلیر

باهار گلیر

باهار گلیر

 

کپنکلر گولدن گوله قونورلار
باهار گلیر پنجره نی باغلاما
بنوشه لر کردیمیزه دولورلار
بولاغ آخیر سن گؤزه لیم آغلاما

…
یئنه قالدی اوز قارالیق کؤموره
ظالیم شاختا ساراییندا گول بیتیر
ایلیق یئللر اسیر سزاق یئرینده
یاز چمنده آچیب چیچکدن چتیر

…
گول دردیمیز بوزا دؤنوب اریسین
خزان وورموش آرزی باغی گول آچسین
یاز گتیرسین یئنیلیگین نغمه سین
کؤنوللرده اومود دالی زوغ آتسین

…
گول اوچوشسون دوداق دوداق دردیمیز
سئوگی سئلی سارسین عومور یوللارین
کؤلگه لرده سارالماسین گولوموز
اسیر تورپاق دادین آلسین باهارین

 

اسماعیل جمیلی