زینب - ملاپناه واقف

زینب

بنفشه تک عنبر زولفون بوی وئریر

هر یویوب سرنده هاوایه زینب

اونون عطرین داماغیمدان سیلمه سین

امانت ائت باد صبایه زینب

قاشا وسمه ، گؤزه سرمه چکنده

سیاه زولفو دال گردنه دوزه نده

ساللانیبان کهلیک کیمی سه کنده

اوخشارسان یاشیل باش سونایه زینب

سنی سئون چوخ بلایه توش اولور

عاغیل گئدیر باشدان فراموش اولور

آوازین گلنده جان بیهوش اولور

قربانام او نازک صدایه زینب

یاناغی لاله سن قامتی داغ سان

آغزی شکر دیلی دوداغی بال سان

سن سن کی یورغون وحشی مارال سان

اولوبسان یاراشیق اوبایه زینب

سن سن پادشاهی خانی واقفین

عاغلی هوشو دین ایمانی واقفین

حسرتیندن چیخدی جانی واقفین

نولورکو گلسن بورایه زینب

سنه - واقف

سنه

دولدو داماغیما زولفون عنبری

واله اولدو کؤنول هاوادان سنه

الیم یئتمز نامه یازیب ، دردیمی

گؤنده ریرم باد صبادان سنه

اوتوروشون گؤزل گولوشون گؤزل

ساللانیشین گؤزل ، یئریشین گؤزل

خویون خلقون گؤزل ، هر ایشین گؤزل

بخش اولوب بو خوبلوق خدادان سنه

دوداقلارین اوخشار لعل یمنه

یادا دوشدو باغریم اولدو قان گئنه

سیاه تئل دوزورسنبیاض گرده

دوشوبدور بو قایدا سونادان سنه

فکر و خیالیندیر کرنلوم زینتی

شیرین سؤزلریندیر آغزیم لذتی

سن سن منیم عمروم گونوم وحدتی

یئتیشمه سین یارب ، بلادان سنه

غم ائوینده سالدین کنجه واقفی

ائیله دین مویندن اینجه واقفی

نئیچون اینجیدیرسن بونجا واقفی

نه حاصل بو جور و جفادان سنه

گلمدی - واقف

گلمدی

باد صبا بیر خبر وئر کؤنلومه

او گولو خندانیم نئیچون گلمدی

خیالیم شهرینی قویدو ویرانا

سروریم سولطانیم نئیچون گلمدی

سرخوش یئریشینه قوربان اولدوغوم

گؤرمه ینده دلی دئیوان اولدوغوم

مینا گردنینه حئیران اولدوغوم

سرو خرامانیم نئیچون گلمدی

قاشی کمان کیپریکلری قلمیم

آغزی شکر دوداقلاری یئملیم

الوان کلاقیلی بیاض ممه لیم

سینه سی مئیدانیم نئیچون گلمدی

محراب و منبریم کعبه علیام

عقلیم هوشوم جانیم هم دینیم دونیام

ائلیم گونوم اوبام میصری زلیخام

یوسف کنعانیم نئیچون گلمدی

نسرین بناگوشوم بنفشه مویلوم

پری لر طلعتیم ملائک خویلوم

بلبل لطافت لیم صنوبر بویلوم

حوری قیلمانیم نئیچون گلمدی

آغزی خئیر سؤزلوم ، دیلی دله کیم

تر گولوم آغ الیم گوموش بیله کیم

قناری جیلوه لیم طاووس باخیشلیم

لباسی الوانیم نئیچون گلمدی

واقفیله دؤندو بیر ساعاتیمیز

نه صبریمیز قالدی نه طاقتیمیز

بو گوندن بئله دیر قیامتیمیز

گلمدی جانانیم نئیچون گلمدی

گرک - واقف

گرک

ندن کوسوب طبعی نازیک اولان یار

بیلمه نم کی ، بونا نه چاره گرک ؟

نه دئمک دیر دوست - دوستوندان اییلمک

گرک کی دوزه له یول ، آرا گرک

گؤره سن نه دومیش رقیب بی پیر

یار اولوبدو مندن ها بئله دیلگیر

من اوندان ائتمه رم جانیمی تقصیر

آما کی اؤزوندن اشاره گرک

اتک لیی آلتون ، قسابه سی زر

چهرایی چارقادی ، قدی برابر

باشیندا برق وورور گون کیمی زیور

اونو گؤرن دوشه اودلارا گرک

اشرفی دن اوزلوک ، اوزونده گؤیچک

بوغازی آلتیندا سیغاللی بیرچک

ضاباق بئله بیاض ، یاناق لاله تک

گؤز آلا گرکدیر ، قاش قارا گرک

اوخویوب واقفین هم ازلیندن

شیرین قافیه دن شوخ غزلیندن

دوروب اؤپوب آیاقیندان الیندن

باریشماق یالوارا - یالوارا گرک

افندی - واقف

افندی - واقف

سیاه تئللی بیر صنمیم اوچوندان

بادا گئتدی دین - ایمانلار افندی

او اوداکی من دوشموشم یانیرام

دوشمه سین هئچ مسلمانلار افندی

کؤنول دئییل سن گؤردویون هاوادا

دردیم اولور گوندن گونه زیادا

هر زامان دوشنده لب لری یادا

تؤکولور گؤزومدن قانلار افندی

منیم مئیلیم یوخدور سلطاندا خاندا

یاریمین آرزوسون ساخلارام جاندا

خالق دا بیلیر منیم کؤنلوم اوندا

اولسا یوز مین نوجوانلار افندی

موللا اودور هر نه گؤرسه کتابدا

اونو شرح ائیلیه حاق دا حساب دا

واقف دئییر سنه منه بو باب دا

هله آزدیر بو دیوانلار افندی

بو نئجه ظولمدور - واقف

بو نئجه ظولمدور منه ائیلیرسن

آدام مگر بیر انصافا گلمزمی ؟

بیرگون گؤره رسن کی والله اؤلموشم

بو قدیر درد چکن آخیر اؤلمزمی؟

خوبلارین بعضی سی نئچه زاد اولور

یارین غمگین قویار اؤزو شاد اولور

بیر سئوگی کی ، سئوگیسیندن یاد اولور

مگر اونون یاخشی لیغین بیلمزمی؟

خوبلاردا عادت دی، نزاکت ساتار

گئنه خیالینی خیالا قاتار

گؤزل اولان مگر باشین دیک توتار

عاشیقیندن دوغرو هئچ آیریلمازمی

عشق اودونا یاندی جانیم سربه سر

آللاها باخ ، ای ظالیم و ستمگر

عاشیقینه قانلار آغلادان دیلبر

رحمه گلیب گؤز یاشینی سیلمزمی؟

بیر پری اولایدی بو دم دن اؤترو

اؤزون اؤلدوره یدی آدم دن اؤترو

قدیر بیلن یاخشی همدم دن اؤترو

واقف ، جان اوزولور ، باش اوزولمزمی؟

قربان اولدوغوم - واقف

 قربان اولوغوم - واقف

صفالار گتیریب تشریف بویوردون

 

قدم باسدین بیزه ، قربان اولدوغوم

 

آز قالا کی سنین حسرتین بیزی

 

اینجلتمیشدی اوزه ، قربان اولدوغوم

 

..

 

سن گلدین نور دولدو ائوه اتاغا

 

گلدیین یوللارا ، جانیم صداغا

 

دوروب قربان اولماق سن تک قوناغا

 

نوش دور جانیمیزا ، قربان اولدوغوم

 

..

 

من مایلم سن دن دوشمه رم ،حاشا

 

بولوت زولفه ، آق قاباغا ، آی قاشا

 

قوی دویونجا باخسین ، ائتسین تماشا

 

حیران دی گؤز گؤزه ، قربان اولدوغوم

 

..

 

سن قدیینه یاشیل آللار گئییجی

 

واقف داخی سنه غزل دئییجی

 

شکر اللاها دئییل آدام یئییجی

 

ئولور گلسن بیزه ، قربان اولدوغوم