گؤرمه میسوز - معجز شبستری

ائشیتمیسوز کی یانار سنگ خاره گؤرمه میسوز

یانان کؤنولده سیز هرگز شراره گؤرمه میسوز
فراق یار ائده ر خانمان عاشقی برباد
سیز هرگر اود دوشه صبر و قراره گؤرمه میسوز
وطن دن آیری دوشن چوخ غریب گؤرموسوز اما
غریب کرب و بلا تک بیچاره گؤرمه میسوز
ائشیتمیسوز کی علی اکبر اؤلدو کرب و بلاده
ولی او گول بدنی پاره پاره گؤرمه میسوز
نئجه یارالی اوغول وای دئیردی اکبره لیلا
گلنده مرغ سحر ، آه و زاره گؤرمه میسوز
ائشیتمیسوز چوخ عروسون تویی دؤنوب یاسه
عروس فاطمه تک بختی قاره گؤرمه میسوز
سکینه باشینه قامچی ووراردی شمر ستمگر
ائشیتمیسوز بو سؤزی اشکاره گؤرمه میسوز
دوداغلارین دایادی بوسه گاه احمده زینب
یارالی نعشین اؤپنده دوباره گؤرمه میسوز

جهل - معجز شبستری

جهل 

قالمايين ای اهل وطن جهل له
گئيمه يين اندامه کفن جهل له
جانيمي ياخديم اودا، من جهل له
آه من الجهل وحالاته
احرق عمری بحراراته

جان نه ايميش، بيلمه ديم عالمده من
آلديم اله تيغ، محرمده من
قانيمی تؤکدوم يئره، بير دمده من
آه من الجهل وحالاته
احرق عمری بحراراته

گاه باشيم آغريری گاهی گوزوم
گاه اليم تيتريری، گاهی ديزيم
اؤز ائويمی جهل له ييخديم اؤزوم
آه من الجهل وحالاته
احرق عمری بحراراته

گئتديم حکيمه دئدي: آت، یازليغي
سالميش آياقدان سنی، قان آزليغی
قان ايله دير چونکی کئفين سازليغی
آه من الجهل وحالاته
احرق عمری بحراراته

ايگنه نی سوخدو قولوما، ووردی قان
ياندی قولوم، ائيله ديم آه وفغان
قورخورام آخير منی ييخسين بو قان
آه من الجهل وحالاته
احرق عمری بحراراته

درديمه دوقتور ائده بيلمز علاج
بيتدی پولوم، قووزادی باش احتياج
ايش گوره بيلمز کی، عليل المزاج
آه من الجهل وحالاته
احرق عمری بحراراته

درد معيشت قاپوسين باغلادی
اهل وعياليم قاليب آج، آغلادی
سينه می بو جهل عجب داغلادی
آه من الجهل وحالاته
احرق عمری بحراراته

چوخ شکور - میرزا علی معجز شبستری

چوخ شوکور

دویموری چرخ فلک جور و جفادان چوخ شوکور

چکمیر ال مدتدی بیز بختی قارادن چوخ شوکور

الده توتموش بیر تیکه شور زیغ چؤره ک ظالیم فلک

قارشیلیق بیر یکه جان ایستیر گدادان چوخ شوکور

گون به گون آرتیر دیله نچی کوچه و بازارده

فوت اولور هر گون بیری قحط و غلادن چوخ شوکور

قئیقاناغی ، آشی ، سوتداشی ، لاواش ، کوفته نی

میل ائدیر دولتلیلر ، قورخور خدادن چوخ شوکور

هر مصیبت گلدی چکدیم جانیما .. کیمی

چیوریدیم غم غصه دندویدوم بلادن چوخ شوکور

قندیله چای ماتمینده آغلادوم دورت ایل تمام

گؤزلریم بی نور اولوب دوشدی ضیادن چوخ شوکور

ایندی ده نفتین عزاسین ساخلاماق لازیم گلیر

فارغ اولمور باشیمیز یبر گون عزادان چوخ شوکور

گاز ترقی ائتدی بوش قالدی فقیرین لامپاسی

بیر بو قالمیشدی اودا گئشدی قضادان چوخ شوکور

بو گئجه رویادا گؤردوم گون چیخیب بایرام اولوب

لوتلره پالتار یاغیر عرش علادن چوخ شوکور

ایلده بیر لو او یئییردی بینوا یوخسول پیلوو

اودا کوچ ائتدی بو ایل دار فنادن چوخ شوکور

قاضی الحاجاته یالوارسین گرک محتاج اولان

آز دگیل رحمی خدانون اغنیادن چوخ شوکور

چوخ دعالار ائیله دوخ او خالقین درگاهینه

اولمادی بیر منفعت حاصل دعادان چوخ شوکور

یولیله تعظیم ائدیب عرض ائیله دیم احوالیمی

سخت گؤردوم قلبینی شمر دغادن چوخ شوکور

آز قالیر دعوا بوگون دؤرد یاشینا قویسون قدم

بیر خبر یوخدور هله صلح و صفادن چوخ شوکور

معجزون احوالی چوخ سازدیر دئییرلر ، اصلی وار

جیبلری مملوو دور سیم و طلادن چوخ شوکور

 

یا مولا - معجز شبستری

یا مولا

 

گئنه بایرام بدکردار

ائده ر مین نازیله رفتار

اوشاخلار ایستیری پالتار

یئتیش امداده یا مولا

..

جیبیمده یوخدو بیر حببه

یاغوم یوخ قوپ قوری دببه

عبا ییرتیخ ، جیریق جوببه

یئتیش امداده یا مولا

..

بیر اوغلان واردی چوخ سیرتیق

حیاسیز توممانی ییرتیق

نخود کیشمیش دئییر ، فیندیق

یئتیش امداده یا مولا

..

 بقیه شعر در قایاقیزی جانشین بلاکفا

 

بیلمه دیم - معجز شبستری

بیلمه دیم

 

بنده نی عفو ائیله یه ملت گرک

معبده مئیخانه دئدیم بیلمه دیم

باشینی دیواره ووروب سیندیران

عاقیله دیوانه دئدیم بیلمه دیم

..

من نه بیلیم قارقا خوش آوازیمیش

بایقوشا بایقوش دئمه ک اولمازیمیش

تلخدی اوقات شریفیم بیرآز

بایقوش او حئیوانه دئدیم بیلمه دیم

..

گؤردو فیلانکس یوخودا بیر گئجه

قول بویون اولموش یاتیری حور ایله

سرخوشودوم شیره انگوریله

اویقویا افسانه دئدیم بیلمه دیم

..

اون ایکی آی آغلامیشیق موتصل

بو گئجه بایرامدی کیشی آزجا گول

بنده بی تجربه و کم عاغیل

بو سؤزو نادانه دئدیم بیلمه دیم

..

بیس بیسیله باشیمی دنگ ائیله دی

سوره الحمد ایله جنگ ائیله دی

کس سسین ای روشوه یئیه ن مشهدی

عامل دیوانه دئدیم بیلمه دیم

..

بوغ و ساقال صحبتین الدن سالین

ائیله مه یین ذم او قیزیل دیشلری

عصریمیزه لازیم اولان ایشلری

اؤرگدین اوغلانا دئدیم بیلمه دیم

..

دشمن دین گؤیده گه زیر قوش دئییل

معبدی ویران ائده جکدیر اگیل

کس سسیوی باشیوا بیر چاره قیل

قاری قرآنه دئدیم بیلمه دیم

..

گؤرجک الینده غزئته جعفرین

رنگی پوزولدو سیریغی پیرتلادی

غیظه گلیب بمب کیمی پارتلادی

آغزینا قورخانه دئدیم بیلمه دیم

..

ویزر ی وبالی ، گوناهی بوینوما

مشدی جانیم وئر پولونو آجلارا

پئیکری عریانلارا ، محتاجلارا

گئتمه خراسانه دئدیم بیلمه دیم

..

حاجی داداش سالما اؤزون زحمته

وئر او پولو ملت بی دولته

کافیر اگر بورج وئره ملته

بند اولار ایرانه دئدیم بیلمه دیم

..

اویموش عجب غفلته ایرانلیلار

چورت وورار صبح و مسا یوخلایار

من ائله بیلدیم کی او سیر ساخلایار

سیریمی غلیانه دئدیم بیلمه دیم

..

آتدی الین قائمه خنجره

دوردو بئش اون ووردو من مضطره

من ائله بیلدیم کی او سؤز یاخشیدیر

یاتما مسلمانه دئدیم بیلمه دیم

..

دوستا دئیه ر دوست خطایاتینی

تا ائده اصلاح عیوباتینی

دین و وطن دوشمنی ظن ائیله دیم

معجزه بیگانه دئدیم بیلمه دیم

..

سرخوشودوم شیره انگوریله

معجزی گؤردوم دولانیر حورایله

وئرمه ز اؤپوش حوری سنه زورایله

عاشق نالانه دئدیم بیلمه دیم

ترجمه فارسی در اینجا