حاجی رضا صراف دان بیر گؤزل شعر

 

چشم سیه یار دل پیریلن اوینار

آهوی خطادیدیه باخ شیریلن اوینار

سالمیش اوزه تک خالین یاندیرسین حریفی

لیلاج دغل بازدی تدبیریلن اوینار

آئینه ده اؤز عکسینه یاریم اولوب عاشیق

صورتگره باخ چکدیگی تصویریلن اوینار

صبریم کسیلیر عمر آزالیر محنتیم آرتار

فوج مژه تا غمزه پی پیریلن اوینار

روحیم اوچار از بس کی سیزیلدار دل زاریم

مطرب کیمی دستگاه بم و زیریلن اوینار

اویناتماغا یوخ زولفون اگر اولما مکدر

دیوانه اولان حلقه زنجیریلن اوینار

مستانه گؤزون اوینادا قاش ائتمه ملامت

میخانه ده هر کیم قالا شمشیریلن اوینار

تؤک خنجر نازیله قیزیل قانیمی دورما

صیاد هاچان توتدوغو نخجیریلن اوینار؟

چوخ ائیلمه پیچ و خم و دستاریله بازی

قورخام دیه لر فتنه دی تزویریلن اوینار

اوینار تب عشقیله وجودوم گئجه گوندوز

صراف دی گویا غم اکسیریلن اوینار

 

 

دایان قوربانیوام قارداش- حاجی رضا صراف تبریزی

دایان قوربانیوام قارداش

 

علی بیرجه آیاق ساخلا

 

بلاگردانیوام قارداش

 

دیزیم گلمه ز گلم آردینجا

 

دایان قوربانیوام قارداش

 

..

 

علی هرگز دئییم گئتمه

 

گئدیب مقصودووا یئتمه

 

منی ده ناامید ائتمه

 

دایان قوربانیوام قارداش

 

..

 

دوزوم سن سیز قراریم یوخ

 

الیمده اختیاریم یوخ

 

غمیم چوخ غمگساریم یوخ

 

دایان قوربانیوام قارداش

 

..

 

عجب سالدین منی گؤزدن

 

دونرمیش آخر اوز اوزدن

 

مکدر اولما بو سؤزدن

 

دایان قوربانیوام قارداش

 

..

 

اوچار روحوم فراقیندان

 

چیخار جان اشتیاقیندان

 

اؤپوم قوی بیر آیاقیندان

 

دایان قوربانیوام قارداش

 

..

 

باجین بو سرو آزاده

 

اولوب زولفون تک افتاده

 

الیندن توت یئتیش داده

 

دایان قوربانیوام قارداش

 

..

 

بو بولبول قالدی گلشن سیز

 

قالا مشکل دی شیون سیز

 

قاییتمام خئیمه یه سن سیز

 

دایان قوربانیوام قارداش

 

..

 

سنی ایندی یولا ساللام

 

یول اوسته منتظر قاللام

 

وئریب جان دردیوی آللام

 

دایان قوربانیوام قارداش

 

 

 

دیلیم یانسین - حاجی رضا صراف تبریزی

                         دیلیم یانسین

 

دیلیم یانسین اگر دیلدن دییه م گل ترک ناز ائیله

ولی دلده تحمل قالمییب بیر قدر آز ائیله

خدنگ نازیلن ویردین منی ییخدین ، قویوب گئچمه

مسلمانم منه ایسلام رسمینه ن نماز ائیله

کرم قیل باشیمی ، تورپاقدان آل قوی دیزیوین اوسته

منی گل آخر عمریمده عمریم سرفراز ائیله

خراب ائتمه کلیگه دونیانی بیر ایما کفایتدی

نه فکر قتل نه قصد ترک ناز ائیله

سنه کج باخسا هر گؤز قویما گؤزدن ای کمان ابرو

اونی توت ال به ال قربان مژگان دراز ائیله

بلاگردانووام رحم ائت منه  آل جانیمی قورتار

آلیم دردین منی گل دردسردن بی نیاز ائیله

تمام ائیله محدث شرح وئرمه حال محمودی

دانیشماق حالتین وار صحبت حسن ایاز ائیله

خدنگ جانستان غمزه جانان گلیر ای جان

اوتورما جسمده اؤز روحووی چیخ پیشواز ائیله

توکندی نقد عمرون گئتدی ای صراف بی مایه

قوجالدین چاره سیز اؤز دردووه بیر چاره ساز ائیله

 

قارا گؤزونده گؤزل - میرزا رضا صراف

 قارا گؤزونده گؤزل قصد جان علامتی وار

 

قارا گؤزونده گؤزل قصد جان علامتی وار

بو جان اونوندو قوی آلسین منه نه منتی وار

گؤزون گؤز ائیله دی جان آلماغا قاشین آلدی

بو امر خئیرده قاش و گؤزون شراکتی وار

بو درد هجریلن اؤلمه ک اگر چه خوشدو منه

باشیم دیزینده وئرم جان بیر اؤزگه لذتی وار

نه قدر اوخ آتا مژگانلارین توتار سینه م

سنین اوخونلا منیم سینه مین رفاقتی وار

او خنجرین بو باشیم ، کس آپار منی قورتار

چکنمیرم بدنه باشیمین اذیتی وار

شکنج زولفووی گؤرجک دئدی نجوم اهلی

بو آی باشیندا غجب فتنه لر قیامتی وار

گتیر قدملریوه باش و جان ائدیم شاباش

گؤروم بو جان سنه قربان اولا ، لیاقتی وار

ملامت ائتمه منی مدعی اوتان تاریدان

بو عشق عشق مجازی دئییل حقیقتی وار

منیم بو عشقیمه به نزه ر نئجه سنین عشقین

ظهوری منده ائدیب جلوه ، سن ده صحتی وار

منیم نگاریمی عاشیق گؤزونده گؤرمه میسن

همین بو قدر ائشیدیبسن گؤزلدی شهرتی وار

زبان حال ایله حالیمدان ائتمیشم حالی

چوخ اهل حالدی یاریم غریبه حالتی وار

نه قدر من اونو چوخ ایستیرم اوره ک دولوسو

اونون منه بیره یوز مین ائله محبتی وار

ریاض حسن ده سیر گوله اولوب قانع

ریاضت اهلی دی صراف چوخ قناعتی وار

تؤکوب عذاره بو مه پاره - میرزا رضا صراف

تؤکوب عذاره بو مه پاره زولف یاره گلیر

 

توکوب عذاره بو مه پاره زلف قاره گلیر

باخان هلالینه کجراست ذورالفقاره گلیر

چکیبدی قتلیمه خنجر ولیک اؤلدورمز

بو امیر خیره یقین ائیلیر ایستیخاره گلیر

پیاده وادی محنتده مات اولوب قاللام

او شاهزاده نی گؤرسم اگر سواره گلیر

شکسته کؤنلومو بیر گلدی ائیلدی ویران

خرابه ملکی خراب ائتمه گه دوباره گلیر

گلیر بو آهوی وحشی کؤنول خبردار اول

خیالی اؤزگه دی معلوم اولان شکاره گلیر

سالیبدی زولف سیاهین قراخط اوزره مگر

اؤلوب عزیزی ، سالیب قاره اوسته قاره گلیر

بهار اولاندا بئله رسمدیر اوخور بولبول

اوزون گؤرنده اودور کؤنلوم آه و زاره گلیر

او نازنین کیمی معشوقه ، من کیمی عاشیق

بئله گومان ائدیسیز بیرده روزگاره گلیر

انیسیم آه و فغان اولدو مونیسیم ناله

بو غم گونونده عجب آه و ناله کاره گلیر

رقیبی قویمارام عالمده راحت ایلنسین

او قدر آه و فغان ائیلرم که زاره گلیر

یولوندا مایه نقدی توکندی صرافین

گومانی ایندی بو اشعار آبداره گلیر

 

جانیم وای - میرزا رضا صراف تبریزی

جانیم وای

 

منی چرخ فلک آواره قیلدی خانمانیدان

کنار ائتدی کنار خسرو شیرین زبانیمدان

الیم چیخدی گولومدن گولشنیمدن گولستانیدان

طریق عشقده من چکمیشم ال باش و جانیمدان

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

الیمده تار زولفی قصه پرداز اولدوغوم گونلر

کونولده تار عشقی سوزیلن ساز اولدوغوم گونلر

خوشا جانانیلن هم درد و هم ساز اولدوغوم گونلر

سر کوینده ایتلرلن هم آواز اولدوغوم گونلر

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

دئیین جانانه ای خورشید مه رخساریوه بنده

کؤنول جمعیتی چون ذره نوروندان پراکنده

فراقین طاقت و صبر و تحمل قویمویوب منده

علیلم دردمندم دردیمین درمانی وار سنده

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

سنه شایسته دیر گولمه ک نه چون بیر غونچه لب گولسن

ائدیبسن سینه می پیکانم غملن بیله گول گول سن

یانار قلبین منیم احوالیمه گر حالیمی بیلسن

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

اگر من سیز گولوم گئسن تماشای گولوستانه

گؤرو دؤنسون الهی لاله تک باغرین قیزیل قانه

گؤزون بیماریم نرگیس الیندن آلما پیمانه

لبین قربانیم سالما نظر گلبرگ خندانه

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

گؤروم منده سورا شمع رخون پروانه سیز قالسین

ایراق گؤزدن گؤزون بی سرمه زولفون شانه سیز قالسین

ائدن قان کرنلومو مویگون لبین پئیمانه سیز قالسین

او ایکی نرگیس مستین مئی و مئیخانه سیز قالسین

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

اگر آلسان اله ساغر الینده باده قان اولسون

صراحی باشه چکسه ن حاشه لله نوش جان اولسون

دؤنوب پئیمانه یه باخسان اوزه اشکین روان اولسون

اوزون مخمور چشمین مست غمزه ن سرگران اولسون

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

منی ترک ائیلییب گر اولسا یاریم اؤزگه لر یاری

گؤروم عالمده اولسون من کیمی غملر گرفتاری

داغیلسین رونق بازاری اسکیلسین خریداری

گئجه گوندوز اوزه اشک ندامت ائیله سین جاری

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

گزیب من گؤرمه دیم دونیانی محنت خانه دن غیری

تاپیلماز کنج راحت گوشه مئیخانه دن غیری

انیس بزم خلوت یوخ غم جانانه دن غیری

دئمه صراف سن ده یازدیغین افسانه دن غیری

اولان مجنون کیمی زنجیر عشقه بسته جانیم وای

وطن آواره سی غربت اسیری خسته جانیم وای

 

لازیمدیر - میرزا رضا صراف تبریزی

               لازیمدیر

 

اگر چه ناز و غمزه او بت طنازه لازیمدیر

ولی ناز ائتمگه بیر حد و بیز اندازه لازیمدیر

گؤتور مرحم طبیبیم توتما زخم سینه سوراخین

بو دارالملک عشقه بیر آچیق دروازه لازیمدیر

کؤنول مشاطه قانین شیشه یه گر توتسا قوی توتسون

رخ جانانه چون زینت زمانی قاره لازیمدیر

اگر سلطام ملک عشق سن وئر ساخلاما باشین

خیال منصب سرداریلیق سربازه لازیمدیر

منی صباغ درد و غم بویار هر گونده بیر رنگه

یقین معشوقه عشقه لباس تازه لازیمدیر

چیخیب ترتیب دن اوراق اولوب مجموعه جسمیم

محبت رشته سیندن جلدیمه شیرازه لازیمدیر

نهمفته رازدیر آغزین اونی اغیاره بولدورمه

او گیزلین سره همراز اولماق اهل رازه لازیمدیر

دگیل لازیم کؤنول گنجشکینی  پابند زلف ائتمک

او محکم پاچه بند ای نازنین شهبازه لازیمدیر

چمنده باغبان شمشاد و سروین ریشه دن کسدی

گؤروب چون شانه شمشاد او سرو نازه لازیمدیر

دئیین صرافه چوخ لاف محبت ویرما آرام اول

بساط عشقی گؤرمک صاحب اعجازه لازیمدیر

 

شاعر :  میرزا رضا صراف تبریزی

 قایاقیزی در بلاک اسپات

 

شعری زیبا از میرزا رضا صراف

تؤکرم ز بس اؤزه گؤز یاشیم

 

تؤکرم ز بس اؤزه گؤز یاشیم

گئجه گوندوز آه و فغانیلن

یویارام بو صفحه دن عاقبت

آدیمی بو اشک روانیلن

بو طریق عشقده درد دل

منیلن همیشه هماش اولوب

دؤزرم قویوب گئچه بیلمرم

وار اونون رفاقتی جانیلن

نه دیزیمده تاب و توان قالیب

نه بلایه دؤزمگه جان قالیب

نه اجل گلیر منی قورتاریر

نه گونوم گئچیر گذرانیلن

نه گؤزومده وار یوخی یاتماغا

نه دؤزوم نیگاری اویاتماغا

گئجه صبحه دک دئییب آغلارام

یانارام بو سوز نهانیلن

هانی جان آلان کسه یانیمی

گله رحم ائده الا جانیمی

یازیغام نئجه نیگران قالیم

بئله دیده نیگرانیلن

بو کمند عشقه اگر دوشه

قوجالار دیه للر جوان اولور

نییه من جوانیکن اولموشام

قوجا بس بو عشق جوانیلن

من اگر بو یولدا اؤلم منی

سر کوی یارده دفن ائدین

بیری قبریم اوسته اگر گله

تانیسین منی او نیشانیلن

بو اومیدیلن بوکولوب قدیم

کی اولام نگاریله هم نشین

اوخ آتان بو نکته نی تئز بولور

اوز اوخی آتاللا کمانیلن

باشیمی کسنده او نازنین

منی قویمایین ال ایاق چالیم

بو خجالته دؤزه بیلمرم

بویانا اگر الی قانیلن

نه قدر رضایه دئدیم رضا

بو نیگاره باغلاما بئل دئدی

بئله رسم دیر سودیلن گلن

گرک عاقیبت چیخا جانیلن

 

شاعر : میرزا رضا صراف